لتفتيح المناطق الغامقة

النهارده هنشوف مع بعض مجموعة من الوصفات الطبيعية اللي هتساعدك على تفتيح الأماكن الغامقة في الجسم خصوصا إن دي مشكلة بتعاني منها بنات كتير جدا نتيجة الاحتكاك وكمان جفاف البشرة في المناطق دي، كمان هنشوف مع بعض مجموعة من النصائح للتخلص من الحبوب والعناية ببشرة الجسم... يلا نشوف مع بعض.





وصفة الزبادي والترمس



دي وصفة ممكن تعمليها قبل إزالة الشعر لتفتيح الأماكن الغامقة في الجسم زي منطقة الكوع والركبة، وكل اللي عليكِ إنك تحضري الحاجات دي...



المكونات:

زبادي.
ترمس مطحون.
عصير برتقال.


الطريقة:

اخلطي المكونات دي كلها مع بعضها، وافرديها على المناطق الغامقة في جسمك، وسيبيها لمدة 10 دقائق وبعد كده اشطفي جسمك بماء فاتر، وعلى فكرة إزالة الشعر بالسويت بصفة دورية كل 20 يوم من الكوع والركبة حتى لو مافيش شعر فيهم بيساعد على تفتيحهم.



وصفة زيت الزيتون



دي كمان وصفة حلوة أوي لتفتيح منطقة تحت الإبط أو بين الفخدين "منطقة خط البكيني".



المكونات:

زيت زيتون
زيت لوز
دقيق خشن "دقيق البسيسة"


الطريقة:

اخلطي كل المكونات دي مع بعضها وافركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع، وعموماً لو عايزة جسمك كله يبقى لون واحد لازم تاخدي حمام يومياً وتستعملي غسول يومي للجسم، وممكن تستخدمي الليفة المغربية في فرك جسمك مرتين كل أسبوع، بس مش أكثر من كده علشان جسمك ما يلتهبش.



وصفة العسل والملح الخشن



لو كنت بتشتكي من وجود بقع في بشرتك نتيجة الحبوب يبقى ممكن إنك تتخلصي من البقع دي بإنك تعملي الوصفة دي...



المكونات:

عسل
ملح خشن
ترمس مطحون
عصير ليمون


الطريقة:

اخلطي المكونات دي كلها مع بعضها كويس وبعد كده افركي الخليط ده على جسمك، بس خدي بالك أن الفرك يكون بالراحة علشان بشرتك ما يحصلش لها أي التهاب، سيبي الخليط على جسمك لمدة 7 دقائق، وبعد كده اشطفي جسمك بماء فاتر. كرري الوصفة دي مرتين في الأسبوع وهتشوفي الفرق بنفسك.. كمان ممكن إنك تستخدمي مقشر يومي زي "كلين أند كلير".





نصائح للتخلص من الحبوب



ظهور الحبوب في الجسم وخصوصاً في منطقة الظهر من المشاكل اللي بتقابل بنات كتير وبتعمل نوع من القلق والضيق، وعلاجها الوحيد هو أنك تستشيري دكتور أمراض جلدية علشان يدّيكي العلاج المناسب لها ومع العلاج تعملي بالنصائح دي علشان تعالجي مشكلتك:




تبعدي عن الملابس المصنوعة من أنسجة صناعية وتخليكي دايما في الملابس المصنوعة من القطن، ويا ريت إنك في الفترة اللي بتعاني من مشكلة الحبوب تبعدي عن الباديهات الضيقة اللي بتكون ملتصقة بالجسم.
لازم تاخدي حمام يومياً، وفي الصيف ممكن مرتين في اليوم.
تستعملي صابونة طبية أو حمضية "ودي بتكون موجودة في الصيدليات" مع الليفة العادية، بس لازم تطهري الليفة كويس بعد الاستخدام بمطهر زي "ديتول".
لو عندك دمامل ممكن تفركيها باستخدام مناديل مبلولة وبعد كده تمسحي مكانها بقطنة مبلولة بكحول أبيض.


منقوووووووووووووووووووووووووووووووووول